Thandi Hyderabadi Biryani: Khushboo Hai, Dum Nahin !!

Thandi Hyderabadi Biryani: Khushboo Hai, Dum Nahin - My quick take on web series “Rana Naidu S02” (Netflix)

Arre bhai log, do saal pehle jab Rana Naidu Season 1 aaya tha, maine ek review patka tha titled ‘राणा जी माफ करना’. Kyun? Kyunki woh pehla season tha jaise mirchi bajji mein daal diya ho full bottle Tabasco—galli-galoch ka buffet, steamy scenes ka exhibition, aur action aisa ki lagta tha Animal movie ko 10-episode ka web series banake chhod diya.

Par kya karein, wahi bindaas masala ban gaya iska USP, aur Netflix ne turant bola – “Chalo bhai, Season 2 banate!”

Knowing Season 1 ka masaledaar andaz, Season 2 dekhne baitha tha mein bhi ‘Akele’. Expecting ki ab bhi beep beep beep ka DJ chalega, khoon aur confusion mein doobte rahenge hum log.

Lekin kya surprise diya re baba.

Yeh Season 2 toh ekdum sambhal gaya. Rana bhai jo pehle full rowdy bachelor the, ab ban gaya family man — ekdum Premnath se Alok Nath ka safar. Emotional moments, thoda sanskaar, aur thoda sambhal ke baat karna.

Creative team mein Karan Anshuman ka naam dekh ke laga ki kuch Mirzapur jaisa dhamaka hoga. Aur haan, starting ke 2-3 episodes thode slow-cooked khichdi jaisa lagte hain, lekin Episode 4 ke baad pace aisa pakadta ki Bullet train bhi sharma jaaye.

Rana aur Venkatesh Daggubati — full solid. Venkatesh toh har frame mein aisa shine karta jaise Charminar ki lighting Eid ke din. Comic timing, emotion, dialogues — sab lajawab.

Abhishek Banerjee, bhai tu Stolen mein dikhaye apna acting ka gold medal, yahan bas thoda idle mode mein tha, par chalta hai.

Arjun Rampal as Rauf Bhai — kya personality, kya presence. Banda aisa lagta ki agar Hyderabad ka Don Vogue magazine mein feature hota toh yeh Rampal hota. Smart, savage, and stylish — Bollywood ne bhai ke talent ko under construction board laga ke chhod diya hai till now.

Story mein flavour toh tha, lekin kuch scenes aise the ki laga writer ne kadhai chhod ke microwave mein bana diya script. Tight screenplay hota toh yeh dish full biryani with double masala ban jaata.

Aur haan — binge-worthy bolne waale bhai log, apna dimag thoda control mein rakho. Yeh koi 3 AM thriller nahi hai jisme aankhon ke bags ban jaaye. Yeh hai “ek episode roz ka after-meal digestif” type series.

Rana Naidu Season 2 ekdum sahi hai — thoda slow hai, lekin emotion, action aur acting mein mirch-masala balance mein hai. Pehla season jaise gandi galiyon ka Google Maps tha, yeh doosra season thoda family WhatsApp group jaisa nikla — thoda boring, par zaroori.

If you’re into crime thrillers, Mirzapur-style galli-gunda-giri, and emotional rollercoasters — toh ek baar dekh le bhai, par time table bana ke.

Is baar Rana ji maaf hi nahi, appreciate bhi kar sakte hain — bas ending mein phir se “to be continued” daal ke suspense mein khopdi hila diya Bhai.